النهارده 10 مارس 2010 ، يعني تقريبا عام كامل من الإفراج عني بعد إعتقالي لمده 4 شهور بموجب قانون الطوارئ ، سنه كاملة عدت عليا وانا حر طليق ، أي نعم إتقبض عليه مرتين ، بس الحمد لله ، لسه صوتنا طالع

وبالرغم من البهدله الأربع شهور دول ، وبرغم كل الأحداث والفخوخ السياسية إلي حصلت السنه دي

وبرغم كل محاولات التشويه والتعريه والكذب والتأليف وتزيف الحقائق

إلا إني لسه علي العهد ، عهد المقاومة والإباء ، عهد الشهيد عز الدين القسام الأبدي

فالله خير حافظ وهو أرحم الرحمين

قبل شهرين من إعتقالي في عام 2008

بعد عام كامل من إعتقال

وبهذه المناسبة ، راح أكتب خواطر عام من الحرية بعد إعتقال طويل نسبيا، بس قبلها أحب أن أذكر شيئ عن البرادعي والحمله المستقله لترشيحه .

الحمد لله الذي فضلني عن الكثيرين وماخلانيش في حملة ترشيح البرادعي

علي الأقل أحس إني مستقل في رأي وفي نفسي وفي كلامي مع الجميع

الحمد لله إني عندي من الشفافيه مش عند ناس كثير

الحمد لله إني مش شخصنت قضيه ولا بقي ولائي لشخص ولن يكون ولائي لشخص ، مهما كان الشخص ده

خواطر عام من الحرية بعد الأسر

*إتقن إختيارك لأصحابك ولأصدقاء ، فربما يغتالك الصديق قبل الغريب

*إتقن عملك ومهمتك مهما كان كلام الأخرين

*إعمل بِجد وبِصدق وفي صمت ولا تلتفت إلي الشهره وإلي الكلام البغيض

*حياة الأخرين قد تتوقف علي خطوه منك فلا تبغل عليهم بها

*حارب من أجل الأخرين ولا تنتظر رد منهم

*إذا خانك القريب فلا تعود إليه مره أخري

*لا تضع سرك عند أحد مهما كان فربما يطعنك في ظهرك

*لا تعترف بالمثل الشعبي القائل “انا وإبن عمي علي الغريب ” ﻷنه غير حقيقي وغير صحيح

*إعمل بصدق وإستخدم كل الوسائل التي ممكن أن تكون أمامك ولا تقتصر علي وسيله واحده

*إن جالك الموت الأول خده

*إنشر فكرك في كل مكان في الأرض وحرض الأخرين علي ان يكونوا في صفك فأنت لن تستطيع أن تحارب العالم كله وحيدا

*مد يدك بالخير مره وإثنان وثلاث ، وإن لم تجد يدا في يدك فلا تقدمها مره أخري فهمه مش يستهلوا

*لا تضع وقتك مع من خانك ، ولكن إعرف كيف خانك

*إزرع اليوم بذره ، وإرويها بالماء، فغدا ستغدوا شجره عظيمه وتعطيك من ثمارها ما أردت وتستريح تحت أغصانها من الغبار والحر

*كن عظيما أينما كنت

*لا تثق في شخص يعيطك خنجرا في ظهرك بعدما وقفت معه

*حطم بإرادتك الأصنام

سأعيش رغم الداء والأعداء كالنسر فوق القمه الشماء

يوم 9 مارس ، هو يوم من أيام الحرية في هذه البلاد المنكوبة المحكومة بإستبداد ظالمين، في ذاكرتي الشخصيه له عنوان لا أنساه ، فنسمات الحرية كانت تقترب أكثر فأكثر ، بعد أربعه اشهر من إعتقالي في القضيه رقم 1414 أمن دوله عليا طوارئ بتهمه التضامن مع قطاع غزه المحاصر ودعم المقاومة الفلسطينية وخصوصا كتائب العزه ، كتائب الشهيد عز الدين القسام

9 مارس 2009 ، بدأ تنفيذ قرار إخلاء سبيلي من نيابة أمن الدوله العليا طوارئ ، متوجها إلي قسم أول المنصورة ، ليتم التحقيق مع بمعرفة ظابط أمن الدوله المسؤول عن الإخوان في مكتب أمن الدوله بالمنصورة، ثم يقرر الإفراج عني في اليوم التي

9 مارس ، هي جماعة الأساتذه والدكاتره بالجامعات المصرية الذين يطالبون بإستقلال الجامعات المصرية من قبضه الأمن

9 مارس عام 1969 ، إستشهاد الفريق عبد المنعم رياض ، رئيس أركان القوات المسلحة المصريه في عهد عبد الناصر ، والمخطط لحرب الإستنزاف ، علي الجبهه في السويس

9 مارس 1919 ، ثورة 19 بقياده سعد زغلول

9 مارس عام 1098 إنتصار قوات نور الدين زنكي علي القوات الصليبية في موقعه حارم بالقرب من حلب

9 مارس 2010 ، مرور ألف يوم علي حصار قطاع غزه ، تلك البقعه من الأرض التي يرفض سكانها دون عن سكان الأرض الخضوع والذل والإستعمار ، والإستحمار كذلك ، سكان ماهانوا ولا لانوا من صواريخ الإحتلال الصهيوني التي صُبت علي رؤوسهم ورؤوس أبنائهم، وكأنهم تحت الدُش يأخذون حماما بالمياة مثل سائر أهل الأرض .

حصار مصري إسرائيلي ، بقياده مبارك ، وتخطيط رجاله البواسل حاملين لواء النفاق والعماله والخيانه .

حصار عربي إسرائيلي بقياده كل الأنظمة العربيه الفاشيه ، التي رفضت أن تقمع شعبها فقط ، بل أرادت التوسع لكي يشمل قمعها سكان أرض الرباط أرض غزه .

فرساله إلي حكام الخيانه والعار والذل :  حاصروا غزه التي تحاصر ذُلكم ونخوتكم وجيوشكم وقلوبكم وإعلام وأرضكم وعروشكم ، حاصروا غزه ولن تستطيعوا حصارها مهما جيشتم الجيوش ، ومهما زرعتم الفولاذ في الأرض ومهما  زرعتم في البحر ألغام ، ومهما زرعتم الطريق كمائن ومنعتم السفن من الإقتراب ، ومهما تحدثتم بكذب ، ومهما ومهما ومهما

والله لن تستطيعوا أن تحاصروا غزه ، يا أعداء الحرية

يارب خد روحه وهوه هناك وماترجعهوش ، يارب يموت ونخلص منه يارب

يارب بحق كل حاجة حصلت في الشعب المقهور والشباب المعدوم وبحق كل المعتقلين السياسين إلي إعتقلوا في عهده وإلي ماتوا في عهده

يارب

خده يارب وخلصنا منه

مش عايزينه يرجع مصر تاني لا هوهولا ولاده

أحمد مصطفي ، مدون مصري من محافظة كفر الشيخ ، خطفته المخابرات الحربية النهارده في تمام الساعه 10 صباحا من موقف كفر الشيخ وهوه متجهه إلي الجامعه ، وذلك بسبب تدوينه كتبها في فبراير 2009.

القصه بترجع لما كان النيله إلي إسمه حسني مبارك في كفر الشيخ في يناير 2010 ، في اليوم ده إستدعته المخابرات بخصوص تحرك محتمل لشباب 6 أبريل مضاد لزياره حسني مبارك بعد مكالمات إلتقطتها جهاز المخابرات الحربية بين أحمد مع بعض قيادات الحركة في القاهرة ،  إتكلموا معاه بخصوص 6 أبريل وبخصوص مدونته ، وخاصه بوست كان أحمد كتبه عن الكلية الحربية من سنه تقريبا في فبراير 2009 .

إمبارح الأربعاء المخابرات إتصلت بأحمد تاني وطلبت إنها تقابله ، وإنهم هيبعتوا ليه عربيه تاخدوا النهارده الخميس من قدام الجامعه الساعه 10 الصبح، أحمد رفض إنه يروح ليهم، فما كان من المخابرات الحربية إلا إنها نصبت له كمين في موقف كفر الشيخ حيث يأتي أحمد من بلدته “الحامول” إلي مدينه كفر الشيخ متجها للجامعة .

إتخطف أحمد النهارده الساعه 10 الصبح من قبل المخابرات الحربية ، والنهارده بليل تقريبا ، أهله إستقبلوا مكالمة من محامي {مجهول} بلغهم إن أحمد إتحول للمحكمة عسكرية ، وإن النيابة العسكرية قد حققت معاه بتهمه نشر أخبار ومعلومات تشوه صورة القوات المسلحة ، وإنه أخد 4 أيام علي ذمه التحقيق، إضافه إلي إن المحامي طلب منهم إنه مايبلغوش أي حد أو أي جهه مهما كانت عشان مش عايزين دوشه .

بعد ما راجعت مدونه أحمد وقريت التدوينه إلي إتحول بسببها للنيابة العسكرية وجدنا تعليق من واحد إسمه تامر بتاريخ – 26 يناير 2010 – بيهدده وبيدافع عن الكلية الحربية وبيقوله إنه هيبلغ الكلية الحربيه “ولو راجل يستني ويشوف إلي يحصله ”

إقتباس

اضيف في 26 يناير, 2010 11:44 م , من قبل تامر
من مصر

قسما بالله انت ماتعرف حاجة
وكلامك على الفاضى وانت اصلا ملكش لزمة علشان مافيش حد بيظلم حد وبالذات فالكلية دى وانت لو راجل استنى يومين بس وحتشوف اللى يحصلك
انا عملت برنت للصفحة وحوريك الكلية دى حتعمل فيك

انا حوصله ان شاء الله للكلية

أحمد دلوقتي مانعرفشي عنه حاجة خالص ولا نعرف مكانه فين ولا مبيت فين لحد مايتعرض علي النيابة العسكرية ، والمحامي إلي إتكلم ده طرف المخابرات/الأمن ومش عايز يبلغ أهله بأي تفاصيل ومعناه كده إنهم عايزين يلطشوا أحمد حكم وخاصه إن المحاكم العسكرية مافيش أسرع منها في تقليب القضايا كلها وخاصه إن إلي بيحكم ده بيبقي ظابط مش قاضي ولا ليه علاقه بالقضاء.

الحرية ﻷحمد مصطفي

في الحقيقة مش عارف أبدأ منين بالظبط ﻷن الكلام معقد شويه جوه دماغي ، بس انا عايز أتكلم شويه عن حوار البرادعي وترشيحة للرئاسة ، والحملة إلي قايم بيها مجموعه من الشباب لترشيحة لرئاسه الجمهورية ، وإلي بتنقسم لثلاث حملات (الحملة القومية بتاعت الحزب الدستوري الحر – والحملة المستقله بتاعت الشاعر عبد الرحمن يوسف – والحملة بتاعت شباب 6 أبريل).

الكل عارف موقفي من البرادعي كويس جدا ، وسبق وإن إتكلمت عنه قبل كده في تدوينه سابقه، وكنت من حين ﻷخر بفصح لمجموعه من الشباب لرأيي في البرادعي وكلامه وأفكاره ، وخاصه بعد كلامه في مجلة «فورين بوليسى» وإلي نشرت ترجمتها جريدة الشروق، وإلي رد عليه البردعاوي باسم فتحي وقال إن البرادعي بيتكلم بطريقة {ولا تطلبوا الولاية} .

كنت براقب جروب البرادعي بتاع الحملة المستقله وكلام باسم فتحي وإسراء عبد الفتاح وأحمد ماهر وطريقة تعاملهم معي وردهم عليه في رأيي عن البرادعي ، وطريقة كلام الناشطين الجدد بتوع البرادعي ، وكمان حواراتي مع كتير من الناشطين في تيارات تانية من الإصلاح والتنمية والغد والجبهه وغيرهم وغيرهم .

وبصراحه إلي بيحصل ده كله كارثه ، وطريقة تعامل البردعاوية في ملفهم ده وكلامهم عن البرادعي ، والتقديس إلي بيقدسوه ليه ، وكأنه المهدي المنتظر القادم ، ومحولاتهم الدفاع والدفاع والنقاش والجدال اللامتناهي ، والحديث عن البرادعي إنه إلي هيحل حلول مصر كلها ، وإنه اللمبة إلي جايه تنور النور إلي همه مش عارفين ينوروه عشان مش بيعرفوا يدسوا علي الزرار وإنه هوه إلي جاي من بره وهوه إلي عارف الزرار بيداس أزاي فهيدوسه .

كل ده لا يعني إلا مصيبه واحده ، وهي صناعه إله جديد، بديلا عن مبارك ، كل القصه إننا هنشيل مبارك ونحط البرادعي ، وبس ياعم، البرادعي هيقوم بالتغيير مش هيقوم ، المهم إننا هنشيل مبارك ، أي نعم إن أول خطوه في التغيير هي إزاحه مبارك ، بس الأمور لازم تتسم بالعقل ، ونكسب معانا نقطه في تغيير ثقافه الشعب ، وزرع ثقافه جديده بدل ثقافه الإله والتشخيص ، وإن الناس تعقد أمالها علي شخص أو تغيير من الخارج ، زي ماجهه محمد نجيب وعبد الناصر وعملوا الإنقلاب العسكري وخلصوهم من الملك ، هيجي البرادعي يخلصهم من مبارك ، وماكسبناش حاجة لصالح الشعب، إلي المفروض إنه يؤمن بقدرته علي تغيير أي حد يكون موجود .

أنا مش بحب كلمة “مناضل أو بطل” وأي محاولة لتقديس شخص ، حتي لو كان أنا ، وده إلي خلاني أكرهه بتوع جماعة لن تمروا اللوزعية لما حد منهم جالي بعد خروجي من فتره الإعتقال بتاعت قضيه تنظيم حماس بتاعتي وقالي ، إني بقيت في نظر الشباب بطل ورمز وقدوه ، وإني المفروض أقود الشباب، وإنهم كلهم هيبقوا ورايا، في اللحظه دي بالذات قررت إني أبتعد عن لن تمروا تماما ، ﻷني برفض التقديس ﻷي شخص مهما كان ، وده إلي خلاني ضدهم ومتأكد إنهم غلط في كل حاجة بيعملوها .

غلطه البردعاوية إلي همه واقعين فيها وإلي مش هيترجعوا عنها ، وإلي مش هتخليني معاهم أبدا ، إنهم بيصنعوا إله جديد ، وبدل ما يطلبوا من الناس إنهم يروحوا ينتخبوا الحرية أو ينتخبو التغيير أو ينتخبو الحياة أو ينتخبوا رغيف العيش أو ينتخبوا أنبوبه البوتجاز ، بيقولوا لهم إنتخبوا البرادعي، وبس .

نفسي الناس بدل ماتروح تنتخب البرادعي ، تروح تنتخب الحرية والحياة ورغيف العيش ، مش الفقر والقهر والموت ، “خش وعلم للتغير”، سيدنا عمر بن الخطاب قال “علموا أولادكم السباحة والرماية وركوب الخيل ” ماقلشي علموا أولادكم الحرب والقتال ، قال علموهم السباحة والرماية وركوب الخيل ، إلي همه الحاجات إلي تعلم الإنسان قوه التحمل والصلابه ومهارات الحياة والقتال الأساسية .

أنا عن نفسي مش بردعاوي ولا نوري ولا موسوي ولا حاجة

وانا عني نفسي مش هنتخب لا البرادعي ولا أيمن نور ولا عصام العريان ولا حمدين صباحي وطبعا لا جمال ولا أبوه

أنا هنتخب رغيف العيش وهنتخب أنبوبة البوتجاز وهنتخب الحرية وهنتخب التغيير وهنتخب الحياة

وهتكلم بالطريقة إلي الناس إلي بتفهمها  في الشارع، مش بطريقة البردعاوية ، هتكلم بالكلام السهل بتاع الناس، الطريقة إلي خلت مصر كلها تتكلم عن إضراب 6 أبريل 2008 ، وإلي خلت بياعه الجرير في السوق عندنا في البلد تقول : ” ده هيحصل حاجة كبيره يوم 6 أبريل والأسعار هتنزل” ، هوه ده إلي بسعي له

وعلي رأي المثل الصيني ، لا تعطيني سمكه ، بل علمني كيف أصطاد سمكة

وإلي يسمعك كلام معسول ، يبقي بيأكلك بمعلقه فاضية

وفي النهاية وعلي رأي غاندي ، : الإختلاف في الرأي ينبغي ألا يؤدي إلي العداء

جيل جديد من نشطاء الإنترنت ، ظهر علي الفيس بوك من بعد 2008 ، وخاصه بعد إضراب إبريل 2008 ، وتطور الموضوع علي شبكه الفيس بوك بشكل كبير جدا ، لدرجه تقريبا وصلت ل 2 مليون مصري علي شبكة الفيس بوك ، إضافه إلي تقريبا مليون أكونت مزيف {يعود الفضل في فكرة الأكونتات المزيفة لجماعة لن تمروا اللوزعية} -بردك لازم ننسب الحاجة لأصحابها ومانقدرشي ننكر الحقيقة- ، المهم يعني ، مع مرور الأيام بدأ يظهر مجموعه كبيرة من المدونين والناشطين علي الفيس بوك بدلا من المدونات ، إعتبر الفيس بوك وعاء ممكن الناس تتقابل فيه بدون النزول للشارع .

وزي ما المدونات أظهرت مدونين من كل تيار وفكر ، كان الفيس بوك كده برضك ، بس بصراحه كان المدونين بيتميزوا بحاجةخطيره جدا ، ألا وهي التمرد علي كل شيئ تقليدي ، وكان الواحد بيسمع حاجات غريبه ومازال ، مدون إتفصل من شغله كمهندس من الشركة الفلانية عشان إكتشفوا إنه مدون ، بالرغم من إنه مش بيكتب في السياسية أصلا، مدونين إتقبض عليهم عشان كذا ، المدونين راحو المدونين جم .

ولما بيتقال إن فيه مدون موجود في الحته الفلانية ، الدنيا بتتقلب وبيتعمل له ميت حساب، وممكن كمان كان ساعات تلاقيه بيتعامل زي الرئيس( والنبي خد حللنا المشكله دي ، والنبي إبني الفلاني عنده كذا) والله كان بيحصل .

وكان ظهر كذلك ، مجموعه كبيره من المدونين الإخوان ، إلي إتعرف عنهم إنهم المجدوون داخل الجماعه ، وإنهم يحملون فكرا جديد في التعامل مع كل شيئ سواء جوه الجماعه أو مع التيارات الأخري، إستخدموا المدونات في نشره كنوع من أنواع الحديث للكل ، وده كان ليه أثر كبير جدا ، وكان ممكن لو الأخ إتعرف إنه مدون في منطقته ، كان ممكن يتحول للتحقيق بدون حتي مايعرفوا إيه إلي بيكتبه( حصلت علي فكره)

ومابين ماقبل عهد الفيس بوك والنضال الفيس بوقي والأن ، نجد شريحتين مختلفتين من الناشطين علي شبكة الإنترنت، وخصوصا في تيار الإخوان تحديدا

أنا عاصرت عهد المدونين الإخوان المنفتحين علي التجارب الأخري والتيارات الأخري ، وعهد الإخوان الإلكترونين 2009-2010 ، المناهضين للتيارات الأخري ، وللأسف تلاقيهم كلهم مافيش أي محاولة للمناقشة مع التيارات الاخري ، أو فهم أو نقاش محوري موضوعي، للأسف مافيش

وبدل عمليه التكامل بين التيارات السياسية وإلي كان مدوني الإخوان هم الضلع المكمل ليها، لقينا ناشطين 2009-2010 بيضربوا في بقيه التيارات بشكل لا يصدق ، وبشكل تحس إن التنسيق والتناغم إلي إتصنع من 2006 لحد بدايات 2009 إتضرب بصاروخ أرض جو بحر .

ويعتبر الإخوانيون الجدد نوع من أنواع الماكينات الإلكترونية المخصصه للحديث والدفاع بسبب أو بدون ، ومحاولة تشويه الأخر دائما ، وعشان كده تقدر تقول عليهم (صورة إلكترونية من أخ عادي) .

فيه حته تانية عايز أقولها ، ممكن كان حد تاني قالها قبلي ، بس هيه واضحه شويه ، همه ممكن يكون شويه الإخوان الجدد كسروا حاله اللاحديث بين الأخ والأخت في الجماعة، وزادت التعامل بين والحديث أون لاين ، لدرجة إن بعضهم بيساهم في حل مشاكل الأخر الحياتيه ، ودي ماكنتشي موجوده بشكل كبير في عهد المدونين الإخوان ، ممكن يكون بسبب إن المدونين الإخوان ماكنشي فيهم أخوات كتير ، وأو إن الإخوات كانوا من نوع خاص وفريد ، بصراحه مش لاقي زيه دلوقتي .

تلاقي الأخ من دول قاعد يرغي مع الأخت من دول طول اليوم ، وتلاقي الإخوه دلوقتي عايشين دور المناضلين {بكره كلمة مناضلين دي} قدام بعض علي الفيس بوك، ودور المدافعين عن الجماعة بوضعها الحالي والدفاع المستميت حتي عن الأخطاء بدون فهم .

وتلاقي الأخ من دول لو جاي ينقاشك يقولك أنا قاري كذا وانا عامل كذا ومقابل كذا وفاهم كذا ، وهوه أصلا تلاقية لمؤخذه في الكلمة {بقره أساسا} ، وتلاقيه أصلا لسه ماخلصشي أول منهج ليه (مبادئ الإسلام) وعمال يتفرعن علي الناس كده وفارد جناحاته.

كمان الناشطين الجداد يكنون عداوه غير طبيعية للمدونين الإخوان القدام، ممكن كمان توصل إنه لو شافه في الشارع يجيب مطوه ويغزه في بطنه ، والله يعني الواحد يحزن علي حاجة زي كده، مع إنعدام فكره التواصل مع الأخرين والنقاش بهدوء جيد

فرق كبير بين ناشطي الإخوان الحالين والسابقين ، وده يخليني أقول إن مافيش غير إتنين بس من الجداد همه إلي تحس معاهم بالحياة والروح في التعامل ، وبرغم صغر عمر الإتنين ، لكن بجد لازم الواحد يشيد بيهم الإتنين دول همه

محمد العتر – مدونة محمد العتر {خواطر إنسان)

ياسر سيد – وده مش مدون ، بس هوه بيكتب ديمة حاجات لذيذ علي الفيس بوك

كنت عايز أكمل وأقول فوارق كتير بين المدونين زمان ، وعهد المدونين الجدد بس مافيش وقت ،، بس هحط شويه صور للذكري عشان نفتكر الفرق

ماعنتدوش هتشوفوا حد بيقف الوقفة دي تاني

ولا دي كمان ، ماعدشي منها مع التيار الجديد

أما دي فإنسواها تماما وللأبد