تسعي كل الأمم دائما إلي أن توفر الكفاية الإنتاجية من المحاصيل الأسياسية التي يعتمد عليها المواطن، حتي إن قامت حرب أو عصف بالبلاد أي أزمة يكون هناك نوعا من الكفاية الإنتاجية والخزين الإستراتيجي للمواد التي يحتاجها المواطن العادي حتي تكون الجبهه الداخلية في أمان.

وتحاول الأنظمة التي تهتم ببلادها أن تحافظ علي إستقرار الجبهه الداخلية، وهناك دائما خطط طوارئ، فلا يعقل أن نستطيع أن نستود القمح من روسيا أو من فرنسا أو كندا إذا دخلنا في حرب “لا قدر الله” مع الصهاينة، أو هاجمنا مهددوا الأمن القومي “رجالات حماس” عبر الحدود الشرقية -كما يزعم أباطرة النظام المصري- مما يهدد الأمن القومي الحقيقي.

ولا يعقل أن نعتمد علي إستيراد القمح من دول العالم، ونقع ففي أزمات مثلما حدث مؤخرا مع روسيا عندما إشتعلت الغابات هناك مما أثر علي محصول القمح، وبسرعه أمر رئيس الوزراء ورئيس روسيا بوقف تصدير القمح للخارج، ﻷنه هيدد الإكتفاء الذاتي من القمح، مما يؤثر علي إقتصاد روسيا وعلي الجبهه الداخلية.

ولكن طبعا إحنا عندنا ناس مش أي أي ولا زي زي، أبو فريدة إلي بعض رجال الأعمال المقربين من السلطة مأجرين شوية أفنار عشان يجمعوا توقيعات علي بيان التغيير، بعض الوشو إلي بنشوفها بيجمعوا التوقيعات همه نفسهم إلي كانوا رايحين السودان في ماتش مصر والجزائر، في أكبر تمثيلية معده من الحزب الوطني للضحك علي دقون مصر، وفي الأخر الناس بتوقع بالرفض والأهالي بيقطعوا بوسترات جمال مبارك إلي في الشوارع .

أبو فريدة بتاع البرسيم

المهم أبو فريدة أتحفنا بتصريح جميل علي موقع الحزب الوطني إن دل فإنما يدل علي إننا هنواجة كارثة تطيح بالأخضر واليابس في البلاد، أبو فريدة إلي بيقولك معاه شهادات من بره وأبو عريف في الإقتصاد وإبن أبوه وأمه بيقلنا إن تحقيق الإكتفاء الذاتي من القمح كلام فارغ وان كلام ده كلام فارغ ومالهوش أي قيمة إقتصادية ولا سياسية، وطلع لنا هوه نظرية إقتصادية زراعية جديدة فريدة من نوعها ووصف إن فكرة الإكتفاء الذاتي دي غير عملية

وحول ترديد الكثيرين لمطلب الأكتفاء الذاتى من المحاصيل الرئيسية خاصة القمح اكد جمال مبارك ان هناك محددات تحكم ذلك اهمها المياه العنصر الحاكم فى الزراعة وان فكرة تحقيق الأكتفاء الذاتى فى المحاصيل الرئيسية غير عملية وان المهم هو اتلتركيز على زيادة الأنتاج وزيادة دخل الفلاح ومساعدته فى زيادة مستوى معيشته .

وحد الله لو حد فهم حاجة من إلي قاله ده يبقي ليه الكلام، ده إحنا عندنا نهر النيل ياجدعان إزاي مانقدرشي نسقي الزرع؟ والماية إلي بتروح في البحر دي مانزرع بيها أحسن ؟

وبعدين التركيز علي زيادة إنتاج إيه ؟

نقعد طول عمرنا ننتج برسيم عشان نأكل بيه الحمير ؟ وماننتجشي حاجة نأكل بيها البني أدمين .

ولا هوه عشان القمح سعره مش عالي فمش ننتج منه، ننتج المحاصيل إلي سعرها غالي بس عشان نبسط الفلاح، ويطلع عين بقي الفلاح عشان يروح يجيب قمح من بره، بدل ماكنا إحنا بنصدر القمح لكل دول العالم.

حد يمشي الشخصية دي من خلقتي عشان خلاص الواحد ماعدشي طايق الغباء ولا الأغبية إلي ماشيين وراه

دائما ما أكرهه المتسلقون.
هؤلاء الذين يتسلقون علي أكتافك ثم عندما يتوهمون إنهم قد صعدوا السُلم فيحاولون إسقاطك من علية.
فإذا بهم هم يسقطون.

حياتي مليئه بهؤلاء المتسلقون، الكثيرون منهم قد دخلوا حياتي، والكثيرون منهم كانوا مقربون مني لدرجة التكامل الفكري والنفسي.

البعض منهم أحببتهم، عشقتهم كما يعشق الأطفال الألعاب والأيس كريم، وكما تعشق الفتيات الشكولاته {وإن أنكروا}، بعضهم قربتهم مني ومن عقلي.

سلمت قلبي وعقلي لبعضهم، ومعهم مفتايح أفكاري ورأسي، وثقت بهم كما يثق الأطفال في أمهاتهم، كنت أحن أليهم دائما مثلما يحن الأطفال إلي صدور أمهاتهم، أرتمي في أحضانهم ثم أبكي إليهم وحدهم، أخرج من أعماق قلبي مالا يخرج ﻷحد.

ولكن يفترق الطريق، ويطعن السكين بطعنات غدر تقتل القلب، بلا رحمة وبلا شفقة، تأكل قلبك مثلما أكلت هند بنت عتبة كبد أسد الله حمزة بن عبد المطلب.

فحين يصعدون سُلم قد ساعدتهم أنت لصعودة، فإذا بهم يلفظوك، يرمونك من علي السُلم، وكأنك  نكرة يجب أن لا تظهر بجوارهم.

يدمي القلب أياما وربما شهور علي الفراق وعلي الخيانة والغدر، يحتويك قلب أخر، ولكنه مايلبث أن يطعنك بطعنات بالقلب نافذة.

ولكنهم متوهمون، يعتقدون إن درجة السلم التي قد صعدوها قد طالوا النجوم بالسماء، فإذا بهم يسقطون سقوطا تلو السقوط، ليصلوا إلي تراب الأرض

أعتقد إن سأقتبس مقولة صديقي حسام يحي:
“مَتعْ نفسك برؤيتهم يسقطونْ”

كنت ديما بشكك في صدق رواية إن الكلب حيوان وفي لصاحبة، وكنت ديما بقول إن دي أكاذيب، وحاجات من الماضي السحيق، فكيف ل”كلب” أن يكون وفي، فالكلاب عندي إرتبط بالخيانة.

بس بصراحة جريدة الشروق أثبتتلي عكس كده تماما، وأثبتتلي إن ممكن “الكلب” يحل مكان صاحبة في عمليات إنتحارية، أو مخاطر أمنية شديدة الخطورة، أه والله مش بهزر، نرجع لموقع جريدة الشروق إلي ناشره خبر عنوانه “مصدر رئاسى: غياب مبارك عن قمتى أفريقيا لأسباب سياسية وأمنية“.

وبعيدا عن إن جريدة الشروق ما حنتشي علينا بإسم المصدر الرئاسي وإلي أصلا المفروض الطبيعي إن إلي يصرح بكده وزير الإعلام، وش الدولة الكميلة، لكن واضح إن فيه مؤسسه إعلامية خاصه بالرئاسة غير وزارة الإعلام، ” طب مانقفلها بقي ونوزع فلوسها علي الصحفيين والإعلاميين إلي مش لاقيين فلوس تعيشهم” .

وبعيدا عن نقطة صحة الرئيس، عشان السيد “المصدر الرئاسي”  مايزعلشي مني، ومايتعصبشي عليه زي ما إتعصب علي دينا سليمان إلي كتبت الخبر، ﻷني ممكن ألعب معاه بالمطوة ﻷني مابحبش حد يتعصب علية ، الجرنال قال حرفيا :

وأضح أن أسباب غياب الرئيس عن كمبالا هى أسباب أمنية

ياريتها جات علي كده وبس ﻷ خد دي كمان عندك

قرارات الرئيس بالسفر تخضع للنصيحة المباشرة للطواقم الأمنية الرفيعة والتى كان تقديرها أن الأمثل هو عدم توجه الرئيس لكمبالا

إستني لسه شوية، خد الفقرة كلها علي بعضيها، وبعدين نرجع نفسر الإقتطاف إلي فوق

«فيه إيه هى دى أول مرة الرئيس يبعث مندوب عنه لاجتماع أو قمة»، أضاف. «وأضح أن أسباب غياب الرئيس عن كمبالا هى أسباب أمنية»، قال المصدر الذى كان قد أبلغ «الشروق» بعد التفجيرات المزدوجة التى هزت العاصمة الأوغندية أن قرار مصر المشاركة فى القمة الأفريقية ولو لساعات يعاد النظر فى شأنه، بالنظر إلى الاعتبارات الأمنية التى تجاوزت التفجيرات لعجز قوات الأمن عن توقيف كل المشتبه فى تورطهم فى التفجيرات. «قرارات الرئيس بالسفر تخضع للنصيحة المباشرة للطواقم الأمنية الرفيعة والتى كان تقديرها أن الأمثل هو عدم توجه الرئيس لكمبالا».

يعني أفهم من كده إن السيد الرئيس محمد حسني السيد إبراهيم مبارك، القائد الأعلي للقوات المسلحة المصرية، صاحب الضربة الجوية في حرب أكتوبر إلي جابتلنا النصر، الراجل إلي خطط عشان يرجع لنا سيناء حقنا، الرجل إلي ضحي بعمره في السودان وواجهه إرهاب القاعده في السودان، هازم أسامه بن لادن و أيمن الظواهري وحده، القائد الأعلي لقوات الشرطة الجدعان قوي قوي، إلي بيسرقوا الفرحة من عيون الشباب، مارحشي أوغندا عشان قوات الأمن السيس إلي هناك فشلت إنها تقبض علي كل -وخد بالك كويس من بعد كل دي- كل المشتبه في تورطهم في التفجيرات .

يعني ماقلكشي المتورطين، ﻷ، قالك، المشتبهه في تورطهم، انا من رأيي إنهم يبعتوا لهم أي ظابط نص كم من أمن الدوله مدعوم بقوات أمن مركزي، يروح يقفش لهم في الشعب الأوغندي الشقيق ويخليهم كلهم يعترفوا بمين إلي نفذ وفكر وشارك وساعد وبارك وزعل وفرح  التفجيرات دي ،

أحم

نرجع للإقتباس التاني كده والنبي، عشان فيه بلوه تانية في الإقتباس ده

قرارات الرئيس بالسفر تخضع للنصيحة المباشرة للطواقم الأمنية الرفيعة والتى كان تقديرها أن الأمثل هو عدم توجه الرئيس لكمبالا

أه والله، يعني الرئيس الهمام لازم يستشير الطواقم الأمنية الرفيعة، -بفتح الراء مش بضمها- يعني النخبة من النخبة، ﻷ وإيه طواقم، مش طقم واحد، يابني برضك ده قائد الضربة الجوية إلي الإسرائيلين لسه مافقوش منها، وكمان الرئيس الفاشل رقم 15 علي مستوي العالم، تصور بقي لما الرئيس المصنف رقم 15 علي مستوي العالم في الفشل، بيستعين بطواقم أمنية، يادين النبي، يعني مش المخابرات بس أو أمن الدولة هيه إلي بتحدد سفرياته، ﻷ، عدد من الطواقم الأمنية، وإلي طبعا إلي زي حالتي وحالتك، مايعرفهوش عنهم حاجة، ولا يعرفوا كم تكلفتهم، ولا يعرفوا همه من أي نوع وأي دولة، وهل هم مرتزقة ولا طواقم مصرية، ولا شركات أمنية أجنبية .

المهم بقي

السيد الرئيس طبعا مارضاش إنه يضيع القمه – واخد بالك إنته من قمه دي يعني المفروض للرؤساء أصلا- فبعت لهم الفدائي مفيد شهاب، الراجل الشهم الجدع قوي قوي قوي، إلي قرر إنه يضحي بروحة وبدمه من أجل حياة السيد الرئيس، وإنه يتحدي المخاطر الأمنية الموجودة في أوغندا ويقوم بالعملية الفدائية ويحضر قمة الساحل والصحراء.

وده أكبر دليل للي بيكدبوا رواية إن الكلاب وفية ﻷصحاب

ماحدش يضحك عل الصورة بعد إذنكم

فجأه رجعت هوجة إستدعاء ﻷمن الدولة لعدد من الشباب المنتمين لشباب 6 أبريل ومن المقربين لها، بشكل غير عادي وبشكل فج ومبالغ فيه، وصل لدرجة الإستفزاز ، إنك تلاقي ظابط أمن الدولة بيستدعي جدتك عايزنها بس لمدة دقيقتين .

أول إستدعاء وصل، كان لزميلنا أحمد البرماوي من 6 أبريل الدقهلية، وده كان في شهر 6 إلي فات، أحمد قرر إنهوه يروح ، وخاصه إن الإستدعاء ده كان لعدد كبير من أهالي البلد عنده وأغلبهم إخوان .

الإستدعاء التاني كان من نصيب زميلنا الحبيب إسلام زاهر ، برضك من الدقهلية، إسلام قرر إنهوه يروح ، ودي ماكنشي أول مرة يروح وكان جالة إستدعاءات قبل كده وراح، وحسب كلام إسلام الظابط إتخض، لما لقاه بيقولة أنا بعادي حسني مبارك وكل أفراد النظام الحاكم.

في الإستدعاء التالت راحوا لزميلنا محمد محمود البيت ، مخبر راحلة وقاله تعالي، محمد محمود قاله مابجيش لظباط، ومابتعملشي مع جهاز أمن الدولة، قام الظابط عماد ناصف إتصل بوالد محمد محمود، وقاله “الواد يجيلي بدل ما أبعتله عربية أمن مركزي تجيبة، إحنا إلي عملنا إلي علينا ولو مجاش هنبهدلة”.

محمد محمود كان بيجهز في شقته ، وصلة التهديد والإستدعاء وهوه قاعد بيجهز في شقته ﻷنه هيتجوز في شهر أكتوبر الجاي، محمد بلغ الظابط والمخبرين ، إنه مستنيهم يجيوا ياخدوه، ويشرفوا في أي وقت، وهوه مستنيهم ومش هيهرب، لكن إن هوه يروح لهم ، فده بعدهم.

أما عن الإستدعاء الرابع فكان لزميلتنا إنجي حمدي، راحوا لإنجي شقه والدها في العجوزة وهناك ولما مالقهوش أو لقوا حد من قرايبها، راحوا لشقة جدتها، وأمين الشرطة بتاع أمن الدوله، قالها تشرفينا في المكتب النهاردة عايزينك في كلمتين.

شوفوا بقي لما جهاز قيادات النظام بيقولوا عليه جهاز وطني، يستدعي بنت، ولما مايلاقوهاش يقوموا يستدعوا جدتها، سلملي علي النخوه والشهامة من ظبابيط أمن الدولة، إنتم طلعتم ظباط عِره بصراحة.

عملية الإستدعاء دي كانت عملية قزرة للغاية، إضافة إلي إنها غير شرعية وغير قانونية، ومعروف إننا في 6 أبريل بنرفض أي إستدعاء بيجلنا ، وبنرفض أي تجاول مع هذا الجهاز اللاشرعي واللاوطني .

عملية التحقيق قانونا لا تكون إلا من خلال النيابة العامة، حتي إحنا بنرفض التحقيق مع نيابة أمن الدولة، أو أي نيابة عامة بتندبها نيابة أمن الدولة للتحقيق معانا في حالة إذا تم إعتقال أو القبض علي أي أفراد مننا .

عملية الإستدعاء نابعة من قانون الطوارئ إلي همه بيقولوا إتلغي، وإحنا برنفض القانون وبنرفض إلي بيطبقوه وبرنفض إلي فارضينه علينا

وماحدش يقولي ظباط أمن الدولة في الحته الفلانية محترمين فنتعاون معاهم، في الأخر همه جهاز غير شرعي أوسس علي أحكام غير أحكام الدستور ، وبأمر مباشر من السادات بعيدا عن القانون الطبيعي، وﻷنه جهاز منحرف ولا يقوم بأداء عملة من حماية الدولة من الفاسدين ومن تجار المخدرات ويوجة كل شغله إلي إرهاب المعارضين، وحماية السلطة الحاكمة.

فلذلك لن نتعاون معهم

وإن تكرر أمر الإستدعاء ﻷي شخص من 6 أبريل، فأوعد المكتب إلي هيقوم بإستدعاء حد مننا إن كل أفراد الحركة في المحافظة والمحافظات المجاورة هيروحوا له المكتب، وهنعمل فضيحة للجهاز في المنطقة، وللظباط في منطقتة إلي هوه ساكن فيها.

أخيرا أخيرا أخيرا

مسعد أبو فجر خرج أخيرا ، بعد إعتقال دام لمده 3 سنوات ، في سجون مبارك ، وفي أكتر من سجن كان عنوانه

أخيرا أخيرا ، مسعد ركن لبنته رناد

أخيررررررررررررررررررررررررا

مسعد خرج

أنا فعلا مش مصدق إنه خرج

أكيد أنا بحلم ياجدعااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااان

بصراحة مش عارف أكتب إيه ، إمبارح كان يوم شاق ، وجامد جدا جدا ، وكان بصراحة علي مستوي عالي من التخطيط والتنفيذ من شباب عمرهم ماشافوا بعض ، ولا عرفوا حاجة عن بعض ، وإلي جمعهم هو خالد سعيد

بصراحة مش عايز أكتب ﻷن الوقفة الأولي أمام مسجد سيدي جابر شارك فيها مايقرب من 5000 واحد تقريب ، والهتافات كانت بترج الإسكندرية ، والوقفة التانية “الصامته” إلي كانت علي طول الكورنيش في كل محافظات مصر.

مش هحكي ولا إتكلم ، بس هحط أربع صور وإتنين فيديو

أولا الصورة الأولي وهي للوقفة الصامته، تحديدا كانت الوقفة في المنصورة ، مش هقولكم إن الشباب إتحدوا الأمن لدرجة إن  إنهم وقفوا في وقفتهم الصامته أمام مدرية أمن الدقهلية

والصورة تتحدث عن نفسها وعن تحدي الشباب

الوقفة الصامته في المنصورة أمام مدرية الأمن - إضغط علي الصورة للتكبير

الصورة التانية كانت لمجموعة من المصريين في دبي ، قاموا تنظيم الوقفة الصامته ، تضامنا مع خالد سعيد ، وبصراحة ده إحساس عالي جدا من المصريين بره مصر ، وتطور غير طبيعي في تحرك المصريين جوه وبره مصر

المصريين بره ، وخصوصا في دبي ، مانسوش خالد ، ومانسوش أهلهم - إضغط علي الصورة للتكبير

الصورة التالته ، وهي لكورنيش النيل في القاهرة ، وبصراحة المنظر مرعب لكل الشباب إلي شاركوا في اليوم ده

الصورة من كورنيش النيل ، الوقفة الصامته - إضغط علي الصورة للتكبير

الصورة الرابعة وهي للشباب في بورسعيد ، بجد المشهد رهيب جدا

مشهد من الوقفة الصامته في بورسعيد

نيجي بقي للفيديو :

الفيديو الأول هو من الوقفة الإحتجاجية أمام مسجد سيدي جابر بالإسكندرية ، أكتر من 5000 واحد شاركوا ، الهتاف بيرج اللاب توب مش بس رج الإسكندرية .

الفيديو التاني ، وهو من للوقفة الصامته للشباب علي طول كورنيش المعادي

أنا كده كلامي خلص

وماعدشي فيه غير إننا مستنين لحظه النصر

هوه ده رد الداخلية علي المتظاهرين سلميا