بصراحة الواحد مش عارف يكتب إيه ولا إيه علي الأحداث إلي فاتت، الأحداث كتير ، وكانت أسرع من بعضها ، حتي انا مش قدرت أكتب بسرعة عن إلي حصل

بس بجد بجد الموضوع يتخلص في حاجتين

الحاجة الأولانية وهي صورة الدكتور حمدي حسن وهوه بيرفع لافته شباب 6 أبريل جوه مجلس الشعب ، بعد المظاهره إلي نظمتها الحركة قدام المجلس يوم 20 ابريل ، بعد ما إلي إسمهم نشأت القصاص وأبو عقرب ورجب هلال حميده ، قالوا علينا “شويه صيع” و “بناخد تمويل” و “إضربوهم بالرصاص”، و”نرجوا من الداخلية عدم التعامل بحنيه معهم ”

الصورة وإن دلت فإنها تدل علي إصرار الحركة والقوي الوطنية علي التغيير ، وعلي إستمرارهم في المطالبة بمطالبهم

• إسقاط حالة الطوارئ
• إقرار قانون مباشرة الحقوق السياسية في مجلس الشعب
• تعديل المواد 76 و77 و88
• الإفراج عن كل المعتقلين السياسين من كافة التيارات السياسية

وبصراحة مش عايز أقول في الموضوع ده أكتر من صورة دكتور حمدي حسن وهوه رافع لافته 6 أبريل جوه المجلس

دكتور حمدي حسن نائب الشعب عن إحدي دوائر الإسكندرية يرفع لافته شباب 6 أبريل داخل المجلس

الحاجة التانية ، وهي تقرير من الجزيرة بخصوص قانون الطوارئ ، وإلي كانوا مستضيفين في الحلقه دي البتاع إلي إسمه أسامه سرايا، بجد بجد التقرير ده يخليني عاجز عن إني أقول أي كلمة تانية في قانون الطوارئ ، كفي وشفي

وأقبل ما أنهي تعالوا معانا يوم 2 مايو الساعة 3 عصرا قدام مجلس الوزراء عشان وضع حد أدني للاجور ، أنا لسه طالب ، بس أكيد مش عايز لما أتخرج وأبدأ حياتي ، ألاقي نفسي باخد مرتب 200 جنية أو 400 جنية

معا من أجل تنفيذ حكم المحكمه في القضيه رقم 21606 بوضع حد أدني للأجور ، والحد العادل إلي بنطالب بيه هوه 1200 جنية

أنشرها وشارك معانا قدام مجلس الوزراء

بالرغم إلي إنه لم يتم الإفراج إلا عن 5 أفراد فقط من الشباب ال33 إلي إتعرضوا علي نيابة وسط القاهرة بسبب مظاهره 6 أبريل 2010 وهم ( مصطفي الشامي – محمد سوكا – مصطفي فؤاد – أحمد حسن – شريف عبد المنعم ) فقط ، وفيه تعنت في الإفراج عن مجموعه الجيزه (أحمد صدومه – محمود سامي – محمود دهشان – عبد الرحمن فارس – نادر سعد المالح – عبد الله سعداوي – أحمد سيد) ، إضافه إلي الزميل شهاب وجيه من حزب الجبهه وفيه تعنت في الإفراج عنه عشان مش يلحق طيارته بكره الصبح ، والزميل خالد محمد في قسم حلوان، إضافه إلي مجموعه المحافظات ( عمرو أسامه – أحمد عبد ربه – محمود ياسين – أحمد سعد دومه – محمد ناجي عبد الرسول ودول من محافظات الدلتا، والزميل روماني صموئيل من محافظة سوهاج .

وفي إنتظار الإفراج عنهم بعد ساعات إن شاء الله ، الا في حالة إن الأمن تعنت أكتر ضد الشباب

وطبعا أحب أن أشكر بصفتحي محمد عادل وبصفتي أحد أعضاء شباب 6 أبريل ونيابة عن الشباب المعتقلين وعن الحركة (ﻷن موقع الحركة واقع) جميع محامي جبهه الدفاع عن متظاهري مصر ،واحد واحد

بجد بجد مجهودهم كان جبار خلال اليومين إلي فاتوا ولسه مجهودهم أكبر

المحامين:
الأستاذ/ سيد فتحى
الاستاذ/ أحمد فوزي
الأستاذ/ محمد عبد العظيم
الأستاذ/ طاهر عطية أبو النصر
الأستاذة/ عبير اسحاق
الأستاذ/ طارق العوضي
الأستاذ/ علاء النفيلي
الأستاذ/ أحمد أبو المجد
الأستاذ/ أحمد حسن
الأستاذ/ حمدي الأسيوطي
الأستاذ/ جمال عبد العزيز
الأستاذة/ روضة أحمد
الأستاذ/ أسامة خليل
الأستاذ/ على سليمان
الأستاذ/ مالك عدلي
الأستاذ/ سيد أبو العلا
الأستاذ على عاطف
الأستاذ/ حسام حداد
الأستاذ/ محمد محمود
19. الأستاذ/ رضا مرعي
الأستاذ/ محمد صلاح
الأستاذ/ محمود طبل
الأستاذ/ أحمد عزت
الأستاذة/ فاطمة سراج
الأستاذ/ عفيفي عبد المقصود
الأستاذ/ ياسر البسيوني
الأستاذ/ عصام محمد عثمان
الأستاذ/ أحمد حسني الجعفري
وجالهم دعم ليلا من احمد فوزي,احمد راغب,خالد علي, ومحاميين تانيين ياما انا معرفش اساميهم

إضافه إلي قائمه شرف في المحافظات تقدر تطلع عليها بأرقامهم أهي

وطبعا ماننساش الخطوط الخلفية للمحامين الرجاله في غرفة مراقبة لجبهه الدفاع عن متظاهري مصر في هشام مبارك :
فوزي
عايدة سيف الدولة
حسام بهجت
عماد مبارك
مها ابو عوف
خالدعبدالحميد
احمدراغب
رامي رؤوف
ورجب عبدالحميد

وجميع المراكز الحقوقية المشاركة في جبهه الدفاع

وعلي رأسها

هشام مبارك

الشبكة العربيه

ومؤسسه الهلالي

والمبادرة المصريه للحقوق الشخصية

ونواب مجلس الشعب المحامين من الإخوان الذين حضروا التحقيقات والذي أتذكر منهم الأستاذ أحمد أبو بركة

قالت الشبكة العربية لمعلومات حقوق الإنسان اليوم ، أن مدير أمن القاهرة ومساعد وزير الداخلية ، قد أرسل انذارا للشبكة العربية لمعلومات حقوق الإنسان ، باعتبارها وكيلة عن شباب 6ابريل ، ليخطرهم بعدم الموافقة على تنظيم المسيرة السلمية التي كان الشباب يعتزمون تنظيمها من ميدان التحرير إلى مجلس الشعب ، لإبلاغ أعضاء مجلس باعتراضهم على مد العمل بقانون الطوارئ.

الصفحة رقم 1 من إنذار السيد إسماعيل الشاعر

الصفحة رقم 2 من الإنذار السيد إسماعيل الشاعر

وسمعني سلام السبت فات والحد فات وبعد بكره يوم التلات ، مستنين السيد إسماعيل الشاعر ورجالته في ميدان التحرير الساعه 12 بالثانية عند ماكدولاند ، عشان المسيرة بتاعتنا إلي هنعملها

وكان محامو وحدة الدعم القانوني لحرية التعبير بالشبكة العربية قد أرسلوا إنذار رسمي لمدير أمن القاهرة ، باعتبارهم وكلاء عن ثلاثة من شباب 6ابريل ” عمر ابراهيم ، أحمد ماهر ، محمد عادل”

الذين قد أمضوا كل حياتهم في ظل حالة الطوارئ ،ليخطروه باعتزامهم تنظيم مسيرة سلمية احتجاجية تبدأ من ميدان التحرير وصولا الى مجلس الشعب لإبلاغ أعضاء البرلمان برفضهم مد حالة الطوارئ المطبقة على مصر منذ 29عاما ، لمدة عامين أخريين.

حد قرأ كلام الداخلية إلي إتنشر في جريدة الدستور عن إستعدادها ليوم 6 أبريل 2010، بجد بجد مسخرة:

وبحسب مصادر أمنية، فإن الوزارة بدأت تحركاتها بتوزيع عربات الأمن المركزى على مختلف أنحاء محافظتى القاهرة والجيزة، على أن تقابلها تحركات مماثلة بالمحافظات. وأكدت المصادر أن تعليمات عليا صدرت بالتدخل والسيطرة على الموقف حال حدوث ما وصفته بـ”أى خروج” من قبل المحتجين، دون أن توضح طبيعة هذا الخروج.

إشمعني همه بقي بس إلي هيوزعوا عربيات أمن مركزي في الشوارع وإحنا ﻷ ؟ والله انا لما قريت الخبر إتخنقت من الكلام ده ، ولذلك قررت إننا نوزع عربيات ملاكي في شوارع القاهره والقصر العيني وميدان التحرير وشارع طلعت حرب وشارع باب اللوق وشارع محمد محمود ، عربيات ملاكي فيها رجاله ووحوش ياكلوا الزلط ، تحسبا ل “أي خروج” من قبل الداخلية ورجالتها.

مش بس كده ، ﻷ كمان دول أعلنوا حالة الطوارئ جوه الداخلية ، كأن حالة الطوارئ إلي إحنا عايشين فيها دي بقالنا 30 سنه مش مكفياهم ، فقالوا يعلنوا حالة الطوارئ جوه لاظوغلي ، وكأن الطوارئ بقت شيئ عادي في البلد دي، وبقي ظباط الداخلية مش هيعرفوا يقبضوا علي الناس الوحشه بتوع الحشيش والأفيون وغسيل الأموال وتوزير العملة بدون قانون الطوارئ.

ياجدعان ده في السودان جماعات مسلحة جت من الجنوب بجيوش وعربيات جيب وأسلحه ثقيله وخفيفه وجيش جيش يعني ، وراحت عشان تستولي علي العاصمه “الخرطوم” ومع ذلك رئيس السودان “البشير” ما أعلنشي حالة الطوارئ، ودخل الجيش في إشتباك مع العيال دي جاب أجلهم ،  وإنتهي الموضوع.

لكن عندنا إزاي؟ – دي مظاهره نازلة ، ولازم نردع المظاهره والمتظاهرين ، إزاي تتعمل مظاهره وإحنا في البلد ، من النهارده مافيش مظاهره ، إحنا المظاهرة – ده طبعا كلام ظابط عبيط تربيه حبيب العادلي

ده حتي في زلزال هايتي ، أه هايتي ، إلي هيه هايتي، الطوارئ ما أعلنتشي إلا 6 أيام بالعدد بالظبط، وبعدين الحكومة ألغت حالة الطوارئ، أه والله الحكومة نفسها هيه إلي أعلنت إلغاء حالة الطوارئ، بالرغم من إن كان فيه ناس لسه تحت الأنقاض، ولسه الدنيا خراب، انا بصراحة كنت زعلان إنهم رفعوا حالة الطوارئ بسرعة كده ، وقلت إنهم مش هامهم حالة البلد والكارثه إلي فيها.

وبهذه المناسبة قررت أن أعلن حالة الطوارئ في صفوف حركة العميد ميت المسلحة اللاعنيفة، وذلك ردا علي إعلان الداخلية حالة الطوارئ جوه الداخلية .

واحده بواحده والبادي أظلم

همه مش فاهمين إنهم داخلين علي أرض مليانه زلط،وهمه أصلا شاربين، متوقعين إن إلي يتهجر يموت ، وإن الجيل الجديد يكون بلا معرفة ولا هدف ،فيه إلي يقول للي الشعب إن التحرير حلم ، بس انا بقول إن التحرير مؤكد، هدفنا واضح ومؤكد، مصر في قلوبنا زي الحكم المؤبد، إحنا الشعب معانا مفتايح للرؤوس إلي بتحرك القلوب ، حقنا مشروع مكتوب مرسوم محفوظ، إحنا بنقابلهم بثقه وببقلب حي، فإحكوا معانا بوضوح مش بغموض الهمس

نعم نحن هنا ، قلوبنا مخالب مغروسه في حقول الأرض ، نحن هنا كأفق ، كشمس الحق ، ومين هنا يقدر يقاوم الشمس

جاي يوم ياجلاد

لجنه السياسات بالحزب الوطني كانت تظن إنها قد إستطاعت القضاء علي حركة شباب 6 أبريل في يونيو 2009  ، ولكنها أتصدمت الأن بأنها أمام قوه لا تقهر ، وأسطورة مقاومة تدعي حركة شباب 6 أبريل ، وإصطدم الامن بقوه وسرعه ودقه وقوه التجهيز  ليوم 6 أبريل .

إتصدموا من إن مخبرينهم ومخربينهم فشلوا إنهم يقضوا علي شباب 6 أبريل ، فشلوا وإرتعبوا لما لاقوا إن مصر كلها بتقول إنها هتشارك يوم 6 أبريل من أجل تعديل الدستور وقانون مباشرة الحقوق السياسية ، ويوم 3 أبريل من أجل إقرار وضع حد أدني للجور 1200 جنية .

فشلوا لما لاقوا أن كل نواب مجلس الشعب ملتفيين حول تعديل الدستور وإقرار قانون مباشرة الحقوق السياسية ، لما لاقوا إن فنانين كتير وشخصيات عامه وإعلامية بتقول إنها هتشارك يوم 6 أبريل من أجل تعديل الدستور .

لما لاقوا إن كل العمال والموظفين تقريبا إلي كانوا بيتحركوا الفتره إلي فاتت من أجل مطالبهم الفئوية هيقفوا بكره قدام مجلس الوزراء للمطالبة بحد أدني للأجور هو 1200 جنية شهريا .

لما لاقونا ، ولقوا الشباب في الإسكندرية واقفين وبيطالبوا بتعديل الدستور ، وبيعتقل منهم ناس ، وبيهددوا البنات ويتحرشوا بيهم بقياده ظابط حقير متحرش اسمه “محمد عبد العزيز مهابة ” ظابط أمن الدولة بالإسكندرية ، ومع ذلك بيرجعوا تاني يوم بيقفوا وبيقولوا ، هاتوا شبابنا من الزنازين – عايزين تعديل للدستور.

إتصدموا إن أكتر من محافظه هيكون فيها وقفات للمطالبة بتعديل الدستور يوم 6 أبريل ، وإن رغم محاولاتهم للتعتيم الإعلام الكل واقف بيساند المطالب بتعديل الدستور .

أنا هكون يوم 6 أبريل في المسيره من ميدان التحرير لمجلس الشعب، وهنسلم الصبح قبلها التعديلات إلي إحنا عايزينها لرئاسة الجمهورية ، من أجل محاصرتهم وإجبارهم علي القبول بالتعديلات وإقرار قانون مباشرة الحقوق السياسية .

ويسقط يسقط حسني مبارك