تقدروا تقولوا إني كنت عايش النهارده في مجاعه ، أو هكذا يكون الوصف تقريبا

بعدما رجعت لبلدتي اليوم بعد أذان الظهر بقليل يوم ، وذلك بعد مشوار طويل عريض يوم الأحد في مستشفي ناصر لإخواننا الجرحي الفلسطينين إنتهي يوم الإثنين في بلدتي بعد أن خرجت من القاهره في اللحظات الأولي ليوم الإثنين هاربا من يوم طويل عريض وجزمه جديده أكلت رجليه .

المهم ، طلعت علي البيت وانا نفسي أغسل وشي بشويه مايه ، وفعلا غسلت وشي ، حاولت أنام شويه ماعرفتيش مش عارف ليه يمكن عشان انا بقالي أكتر من 9 شهور مانمتيش في الشقه دي ، جايز !

المهم ناخد بإيجاز قبل ما البطاريه بتاعت اللاب توب تخلص

الموضوع يتخلص في كلمتين

لا نور ولا مايه ولا عيش

أما أخرهمها فده طبيعي فلا يوجد عيش في البلد أساسا مما إضطرني أن أعدل عن قراري المعتاد في إني أكل طبق البيض المفضل لدي ، وإتجه إلي أكل الجزر الموجود في البتاع إلي علي البتاع

أما الثاني وهو المياه ، فتقريبا كده انا وشي نحس ، فمنذ الساعه 3 تلك اللحظه التي قررت فيها إني أقوم أخد دش ، بعد أن إستراح جسدي قليلا من التعب فأجد أن الحنفيه بلا مياه ، يعني المايه مقطوعه مافيش مايه في الحنفيه ، وإحنا لسه في شهر 3 أهوه ، الله أعلم في الصيف بقي هيبقي الوضع إيه ، وحتي الأن الساعه الثانية عشر بعد منتصف الليل مافيش غير سراسيب مياه قد جائت منذ دقائق قليله إلي الحنفيات التي في الشقه ، وبكده أقدر أقولكم إني هقعد علي عفانتي دي لحد بكره لو لقيت مايه بكره يعني عشان أنا كمان لسه حالق شعري من شويه .

أما أخرهما هو النور ، فأعتقد إن الكهرباء في البلد النهارده كانت بتقطع أكتر ماهي كانت موجوده ، ويبدو إن في ذلك تضامن كبير من شركه الكهرباء مع إخواننا في غزه ، وإنها كانت تقصد فقط أن تجعلنا نعيش بعض من المأساه التي يعيشها إخواننا هناك .

وحتي الأن الكهربا بتقطع كل شويه ، وإلي مصبرني بس بطاريه اللاب توب التي أتمني أن يباركها الله حتي أنهي ما أريد أن أقرأه علي الشبكه العنكبوتية .

وأعتقد إن الحاجة الوحيده إلي مقطعتشي النهارده في البلد دي هي التليفون الأرضي مش عارف ليه وانا داخل عن طريقه “نت ” و أساسا يعني ماعندناش خدمه DSL في بلدنا يعني، وكمان موبيلي كان مشارك في الإضراب النهارده وكان فاصل شحن بعد أن تركت الشاحن الخاص به في القاهره قبل أن أخلع من القاهره .

وبكده إنتم تكونوا عرفتوا يوم في حياه واحد عاش يوم في حياته بلا نور تقريبا وبلا عيش وبلا مياه

لانور ولا مايه ولا عيش

صباحك زي بعضه يامبارك

مصر بقت في عصر المماليك