إمبارح كان فيه وقفة متنظمة قدام نقابة الصحفيين تضامنا مع المدون مسعد أبو فجر “ودنا نعيش” ، وتقريبا مشفناش حد من الساده المدونين العظام أو المهتمين بشأن مسعد ، غير مجموعه بسيطة من 6 أبريل وعدد من النشطاء الأجانب من “مسيرة الحرية لغزة”، بصراحه المنظر كان يكسف

بإختصار بسيط ، ماكنتيش أتصور إن المدونين أو النشطاء في مصر ، ينسوا مسعد أبو الفجر بالطريقة دي ، وخاصه إن كان فيه ناس منهم كانوا زمان مهتمين بموضوع مسعد ، الغريب في الموضوع فعلا كمان إننا مالقيناش حد من كفاية جه ، اللهم غير جورج إسحق ، حتي دكتوره كريمة الحفناوي دخلت علطول من غير ماتقف معانا في الوقفة ، بالرغم من إن مسعد عضو في حركة كفاية .

وقف معانا وشارك معانا كمان مجموعه من مدوني الإخوان ، إلي كانوا جايين لإحتفالية عن القدس ، وبعد مالقوا الوقفة لمسعد وقفوا معانا ، وانا هنا بعاتب الإشتراكيين إلي كانوا بيقولوا إنهم همه الوحيدين إلي شغالين لمسعد أبو فجر .

مسعد دلوقتي أخد قرار رقم 17 بإلغاء قرار إعتقاله رقم 17 ، وهوه في سجنه بقاله سنتين ، بدون أي مسانده مننا

مع مسعد أبو فجر ، أحب أن أذكر الناس برضك ، وخاصه الإخوان منهم والمهتمين بالمقاومة وبغزه ، هو الأسير القسامي أيمن نوفل -قائد محافظة الوسطي في غزه بكتائب القسام – المطلوب رقم 3 للكيان الصهيوني بعد القائد محمد الضيف وأحمد الجعبري-، إلي معتقل في مصر في سجن المرج منذ يناير 2008 ، بدون ماحد يسأل فيه ولا يعمله حاجة

ولو كان المدونين باعو مسعد أبو فجر ، فأنا مش معاهم

الحرية لمسعد أبو فجر

الحرية للقائد القسامي أيمن نوفل