النشطاء في مواجهه ظباط المعاشات – مين إللي طلع صح في الأخر ؟

Want create site? Find Free WordPress Themes and plugins.

عهدت نفسي منذ أيام أسر قائد الإسطول الأمريكي في البحر المتوسط علي لسان الراحل سامح سيف اليزل، عندما كان كتكوت إستراتيجي صغنتوت تائه بين أخشاب إستوديهات مدينة الإنتاج الإعلامي، أن لا أسمع لخبيس إستراتيجي / أمني مجددا.

بس في الحبسه الدُنيا طفحت بسبب قراءه الأهرام والأخبار، سيل من الهري والفَتي المُستباح من طائفه الغُبط الإستراتيجيون / أمنيون، وقريت كمية سف رهيبه، من ناس المفروض إنهم كبروا وعقلوا وشافوا كتير، ولكن واضح إن القعده الكتير بعد المعاش بتسف الدماغ، والفترة إللي كانوا فيها في الخدمة صممت لهم حاله من حالات الهجص الفكري خلتهم يشطحوا وينطحوا بعدم درايه وعِلم، رغم إن البعض منهم المجلس العسكري/ الشئون المعنوية/ الجهاز الإعلامي للداخلية همه إللي بيطلعهم وبيحجز لهم لقاءات يطلعوا يقولوا إللي همه عايزينه، أديهم مالبسوش نفسهم في الهري رسميا، ومنهم إنهم بيشغلوا رجالتهم بعد المعاش ، لذا إسمحولي أن أستخدم التعريف الإعلامي الدقيق والأصح “ظابط متقاعد” أو “ظباط المعاشات”.

كان أغلب ما يردده ظباط المعاشات من معلومات وكأنها لا شيه فيها، أن النشطاء المصريين من القوي المدنية السياسية والحزبية والمنظمات الحقوقية المصرية الخالصه، لا يعلمون ولا يدرون، وأنهم بيفتوا، وإن الكلام إللي بيقولوه ده هجايص ومش موجود غير في الأحلام وبس.

وكان من ضمن ذلك العديد من القضايا والمواقف ممكن نذكر منها (مصرية تيران وصنافير – عدم دستورية #قانون-التظاهر – قانون عدم الطعن علي الإتفاقيات الحكومية – تعديلات لوائح السجون – قرض صندوق النقد الدولي – إستمرار العمل بحاله #الطوارئ – فض #رابعه بالقوة – التحول لإستخدام الحل الأمني في العمل السياسي – تعويم الجنية – …. الخ)

وإذا أخدنا هذه القضايا لمراجعه ومواقف الدولة / ظباط المعاشات في مواجهه رأي النشطاء سنجد إن كل  الكلام النشطاء طلع صح ودقيق برأي المحكمة والزمن، وطلع كلام ظباط المعاشات مجرد فتي وهري وترويج لأكاذيب وإشاعات

قانون التظاهر :

النشطاء : غير دستوري و مقيد لحرية التظاهر وإتعمل عشان يحبسوا النشطاء المدنين وبيحول حق التظاهر لطلب مش إخطار كما نص الدستور

ظباط المعاشات : القانون دستوري والظباط مش محامين ولا بيفهموا في القانون وده أحسن من كل قوانين العالم وموجهه لمواجهه مظاهرات الإخوان

التطبيق : إعتقال نص نشطاء #مصر المدنين من شباب ثورة #25يناير

النهاية : المحكمة الدستورية  تقضي بعدم دستورية القانون

قرض صندوق النقد الدولي أبو 12 مليار دولا

النشطاء : القرض خراب علي #مصر وفيه شروط سترفع الدعم من علي المواطن الفقير وتعيوم للجنية وللسوق

ظباط المعاشات : مافيش شروط من صندوق النقد للحصول علي القرض، ومافيش جنيه هيتعوم ومافيش دعم هيتشال ولا كهربا هتزيد، والمستمثر هينزل مصر بكره الصبح بدولاراته الكتير

التطبيق : تعيوم الجنية ورفع أسعار الكهرباء والمياة والخدمات كاملة، ورفع أسعار المواصلات العامه

النهاية : إنهيار إقتصادي بشهاده كل المؤسسات المالية العالمية، وإنهيار سعر الجنية في مواجهه الدولار والتوجه إلي رفع الدعم حتي عن رغيف العيش

فض إعتصام رابعه بالقوة المسلحة

النشطاء: فض إعتصام #رابعه بالقوة سيحول #مصر إلي حرب أهليه وإنقسام سياسي حاد لن تخرج منه البلاد، ولا يجب إستثناء أي فصيل سياسي رغم رفضنا له ولطريقة حكمة للبلاد

ظباط المعاشات : إعتصام رابعه هيتفض من غير نقطه دم، ومافيش حاجة هتحصل وهنهش الغنم ومحدش هيموت

التطبيق : الإخوان : أكثر من 13 ألف قتيل الطب الشرعي 700 قتيل في صفوف المعتصمين

النهاية : البلد منقسمه سياسيا وإجتماعيا وكل واحد في ناحيه مش عايز يحط إيده في إيد حد

قانون الخدمة المدنية :

النشطاء : القانون غير دستوري وفيه عوار غير قانوني ويعصف بالمواطنين ويجب إعاده تشكيل الجهاز الحكومي البيروقراطي للدوله دون التأثير علي حياة الموظفين الذين يعانون من كل شيئ

ظباط المعاشات : إنتوا مش فاهمين وتطبيق القانون لن يؤثر علي أي موظف في مصر، ده هيبقشش عليهم كمان

التطبيق : مافيش حوافز جديده، وثبات المرتب في مواجهه معدل التضخم للبلاد

النهاية : البرلمان يقر إلغاء القانون والعوده إلي تعديله (النشطاء برضه قالوا التعديل هيفشخ الناس وحصل برضه)

قانون منع الطعن علي عقود الدولة

النشطاء : القانون وجد لحماية الفساد في عقود الخصخصه السابقه والقادمة، وهناك نيه من سلطه مابعد يوليو 2013 إلي بيع أصول الدولة .

ظباط المعاشات : ده معمول لجذب الإستثمار في مصر، وعشان نجر رجلين المستمثر يجي البلد ونحمي فلوسة

التطبيق : حماية للفساد

النهاية : القانون مازال مطعون فيه أمام المحكمة الدستورية العليا بعد قرار محكمة القضاء الإداري بوجود شبهه دستورية، + إن مافيش مستثمرين جم أصلا + المستثمرين القدام طالبوا بفلوسهم ومضاعفات غرامات بعد كشف الفساد

تيران وصنافير مصرية

النشطاء : تيران وصنافير مصرية ولا يوجد وثيقة في أي مكان في العالم تدعي سعودية الجزيرتين من عهد أحمس حتي الأن، والتنازل عنهم جريمة خيانه عظمي، والتنازل عنهم للسعودية هيخلي أمريكا وإسرائيل مسيطرين عسكريا وطبقا للقانون الدولي علي المجري المائي في خليج العقبه كليا وإلغاء السيادة المصرية

ظباط المعاشات : تيران وصنافير مش بتوعنا وإحنا كنا واخدينها بالحُب من السعودية، وإسرائيل ما تتسجرش طحت فلوكه في المنطقة

التطبيق : السعودية ماقدمتش أي ورق بيقول سعوديه الجزيرتين، مظاهرات وإعتقالات في صفوف النشطاء

النهاية : حكم محكمة القضاء الإداري والإدارية العليا بمصرية الجزيرتين وعدم أحقيه أي جهاز أو مؤسسه بالتنازل عن أراضي مصرية لمخالفه ذلك الدستور المصري.

 

دي عينه من قضايا عدت علينا خلال ال3 سنين إللي فاتوا، وممكن نزود قضايا كمان، ونرجع ده لورق ودراسات وأبحاث كتبها النشطاء والأحزاب المصريين إللي موجودين في المعارضة، وإللي بتتهم الحكومة وظباط المعاشات إنهم مش بيفهموا في حاجة وكل كلامهم غلط

والنبي إتهدوا بقي وإلبسوا خيش علي وشوشكم

Did you find apk for android? You can find new Free Android Games and apps.

Comments

comments